Urdaneta City, Pangasinan – Patay ang isa ka 23-anyos nga graduating student matapos mabungguan sang truck samtang nagamaneho sang iya motorsiklo sa Urdaneta City.
Sa report nga ginpahayag natabo ang aksidente sang Sabado sang hapon sa Manila North Road sa Barangay Tulong.
Suno sa kapulisan, sa panalaysayon sang angkas sang biktima nga nakaluwas nga nagkalit lamang nagpreno ang motorsiklo nga yara sa unahan nila.
Bangud sini, nabungguan nila ang likod sang amo nga motorsiklo kag nagtupa sila sa pihak nga lane sang dalan kun sa diin nabungguan sang nagapadulong nga truck ang rider.
Gindugang pa nga madasig ang pagpadalagan sang truck kag ginarado pa sini ang motorsiklo nga nagresulta sa pagkalayo sini.
Deklarado nga patay ang rider samtang gindala naman sa ospital ang iya angkas nga nakaluwas sa insidente, lakip na ang driver sang truck kag ang pahinante.
Sa pihak sini, ginpahayag sang pamilya sang biktima ang daku nga kasubo bangud papuli na ini kuntani sang matabo ang aksidente kag natalana nga magagradwar subong nga bulan.
Sa karon padayon ang imbestigasyon sang kapulisan, samtang ginatinguhaan pa nga makuhaan sang pahayag ang driver sang truck.
