ROXAS CITY – Patay ang 23 anyos nga graduating student, matapos nga maaksidente sa ginamaneho nga motorsiklo, sa karsadahon sang Barangay Balijuagan, Roxas City, alas-6:55 kagab-i sang Domingo, Mayo 28.
Ginkilala ang napatay kay Argie Delos Santos, residente sang Barangay Cudian, Ivisan, Capiz.
Sandig sa inisyal nga imbestigasyon ni PCpl. Ben Angelo Celino, traffic investigator sang Roxas City PNP, nga nagikan sa syudad sang Roxas ang motorsiklo nga Suzuki Smash nga ginamaneho ni Delos Santos kag papuli sa ila barangay, sang naagaw sini ang linya sang kasugata nga Isuzu D-MAX Double Cab nga ginamaneho ni Henry Pionio Dela Cena, 33 anyos, residente sang Brgy. Poblacion, Mambusao, Capiz, nga may sakay nga duha ka mga pasahero.
Bangud sa mabaskog nga impact sang pagkabunggo, nag-angkon sang patal nga pilas sa ulo kag magkatuhay nga parte sang lawas si Delos Santos nga ginpadangat pa sa ospital apang gindeklarar nga dead on arrival sang doktor.
Nag-angkon man sang kahalitan ang salakyan ni Dela Cena, apang wala ang mga ini sang naangkon nga kapilasan.
Samtang, ginkustodiya ang driver sang D-MAX kag ang magtimbang nga mga salakyan, sa Roxas City Police Station para sa nagakaigo nga disposisyon.
Wala man ginpahayag kun yara sa impluwensiya sang makahulubog nga ilimnon ang mga naulamid sa aksidente.
