Ginbasura sang Sandiganbayan ang graft case batuk kay anay Iloilo City Mayor Jed Mabilog may kaangtanan sa kontrata sang gobyerno sa isa ka towing company.
Suno sa korte, may indi makatarungan nga pagka-untat sa pagproseso sang kaso.
Wala man naathag sang Office of the Ombudsman kon ngaa nagdugay ang pag-file sini.
Gin-akusahan si Mabilog kag iban pa nga opisyal nga naghatag sang kontrata sa 3L Towing Services para mag-clamp kag mag-tow sang mga salakyan nga ilegal nga naga-park sa Iloilo City, nga wala naga-agi sa competitive bidding.
Gin-file ang reklamo batuk kay Mabilog sang Abril 2015, pero gin-file lamang ang kaso sa Sandiganbayan sang Marso 2023.
Kabug-usan nga halos walo ka tuig ang nagligad antes na-file ang kaso sa korte.
Bangud sa pagbasura sang kaso, gin-lift man sang korte ang hold departure order batuk kay Mabilog kag ginmando ang pagbalik sang iya bail bond.
