ROXAS CITY – Napalong sang mga pumuluyo kag nagresponde nga personnel sang Roxas City fire station ang nagluntad grass fire sa Sitio Tabay, Barangay Barra kaina sang aga.
Suno kay Punong Barangay Ernie Borreros may nagpalab-ot sang impormasyon sa iya nga may grass fire sa nabukid nga area sang lugar rason nga gilayon sini gintawagan ang Roxas City fire station nga gilayon naman nagresponde.
Ba-se sa pagpangusisa ni kapitan Borreros nagsugod ang kalayo sa nabukid nga area kag madasig nga nagmakot bangud sa mga laya nga hilamon kag dahon.
Ginakabalak-an lamang sang opisyal ang posible paglapta sang kalayo kag indi malayo nga malab-ot ang kapin sa 20 ka mga kabalayan kun naatrasar lamang ang pag-abot sang mga bombero.
Nahibaluan nga kapin sa 300 square meter ang kalaparon sang area nga nalamon sang grass fire.
