Posible nga mangin isa sa pinakamainit nga isyu sa ikatatlo nga semana sang impeachment trial ni Vice President Sara Duterte ang pagbukas sang nga “green box” nga ginapatihan nagalakip sang importante nga mga dokumento nga mahimo gamiton bilang dugang nga ebidensya sa mga Articles of Impeachment.
Sa interview sang Bombo Radyo kay Professor Carl Ramota, ACT Philippines Vice Chairperson, iya ginpahayag nga, mahimo ini maikumparar sa kontrobersiyal nga “second envelope” ukon “mystery envelope” sang impeachment trial ni anay Presidente Joseph Estrada sang tuig 2001.
Suno kay Ramota, ang wala pagbukas sang amo nga ebidensya sadto ang isa sa mga nagpasikad sang malapad nga mga protesta nga nagresulta sa EDSA Dos.
Ginpahayag man niya nga importante nga mangin mabinantayon on ang mga senator-judges sa ila desisyon kon tugutan ang pagbukas sang green box, bangud mahimo ini nga may daku nga epekto sa padayon nga direksyon sang impeachment trial.
Dugang pa niya, kon mapamatud-an nga may kaangtanan ang unod sang green box sa mga alegasyon nga nalakip sa Articles of Impeachment, mahimo ini nga mangin dugang nga ebidensya agud mas mapabaskog ang kaso batok sa bise presidente.
