ROXAS CITY – Arestado ang isa ka babayi kag menor de-edad matapos nga nadakpan sa ginkasa nga drug buybust operation sang Station Drug Enforcement Team sang Roxas City Police Station kag Philippine Drug Enforcement Agency sa Barangay Punta Tabuc, Roxas City.
Ginkilala ang arestado nga si Daisy Catedrilla, 23-anyos isa ka GRO kag residente sang Lemery, Iloilo kag Alyas “Gerald” 15-anyos residente sang nasambit nga lugar.
Narekober sa posesyon ni Katedral ang tatlo ka mga sachets sang ginapatihan nga shabu, P500 nga buybust money kag isa ka unit sang kalibre .38 nga armas-luthang nga may yara sang lima ka mga bala.
Samtang, natigayon naman nga makapalagyo ang live-in partner ni Catedrilla nga si Jerry Lara, 44-anyos residente man sang nasambit nga lugar.
Sa interview sang Bombo Radyo kay Punong Barangay Nestor Buenviaje nga madugay na nga ginamonitor sang mga barangay officials ang hulag ni Catedrilla sa amo nga barangay.
Namutikan nga masami nagatambay sa guha sang ila nga balay sa tagsa kagab-ihanon si Catedrilla kag may yara sang mga indibidwal nga nagapakigtransaksyon sa iya.
Ginkompirmar naman ni Police Master Sergeant Ramil Arcangeles nga nagaserbi nga runner ni Lara sa pagduso sang iligal nga droga ang 15-anyos nga lalaki.
Suno kay Arcangeles nga tatlo ka semana nga ginmonitor sang mga kapulisan si Lara apang madasig nga nakapalagyo matapos nga namutikan nga katapo sang mga kapulisan ang nagapakigtransaksyon sa iya.
Samtang, tuman naman ang pagpanginwala ni Daisy Catedrilla nga iya ang tatlo ka mga sachets nga narekober sa operasyon.
Suno kay Catedrilla wala sini ginapanag-iyahan ang mga shabu kag ginbutang gid lamang sang mga kapulisan sa lamesa.
Apang aminado ini nga nagaduso sang iligal nga droga kun may yara sang kuhaan sang shabu.
Sa karon natalana nga pasakaan sang panumbungon sa paglapas sa R.A. 9165 ukon Comprehensive Dangerous Drugs Act of 2002 kag R.A 10591 ukon Comprehensive Firearms and Ammunition ang duha ka mga naaresto kalakip na ang nakapalagyo nga si Lara.
