MIANAY, Sigma, Capiz — Ginpahamtang ang ground breaking ceremony sang two-storey housing units sa Barangay Mianay, Sigma, Capiz.
Sa interview sang Bombo Radyo kay Mayor Dante Rizal Eslabon sang Municipality of Sigma, Province of Capiz, ginpahayag niya nga ang kada unit may tagsa ka garahe kag ang lugar nga gintukuran sini nasigurado nga indi bahaon.
Suno kay Eslabon, bukas sa tanan ang nasambit nga housing units, apang ginapangabay sang alkalde nga unahon ang mga Sigmahanon bangud sa iya pagtan-aw nga mahimo nga ma-sold out ang masobra 200 ka housing units, lakip sa posible nga makapanag-iya sini ang mga empleyado sang mga opisina, Bureau of Fire Protection “BFP”, Philippine National Police “PNP”, Manunudlo kag iban pa nga makapasar sa screening sang Pag-IBIG.
Pahayag pa niya, nasigurado nga dekalidad ang matukod nga two-storey units bangud may liability ang contractor kag developer sang building. Paagi man sa padayon nga pagmonitor sang mga opisyal sang banwa, masiguro ang pagpatukod sang mga unit nga mapag-on kag kalidad.
Dugang pa sang natungdan, ginabulubanta nga P1,000,000 million ang pondo para sa sini nga proyekto, samtang yara sa 30 ka tuig ang termino sang pagbayad.
Sa karon, nahibaluan nga ang mga mangin trabahante para sa proyekto pagakuhaon mismo sa banwa sang Sigma, kun sa diin magapaidalom man sila sa training sang Technical Education and Skills Development Authority “TESDA”.
