Nagpanawagan si Volt Bohol, presidente sang August Twenty-One Movement (ATOM), nga magresign na si Senador Alan Peter Cayetano bilang mambabatas bangud sa ginaalegar nga makauulaw nga imahe sini sa mata sang internasyonal nga komunidad.
Kasunod sang iya panawagan, ginbatikos man ni Bohol ang kampo ni Cayetano sa ginaalegar nga paggamit sang ngalan ni yumaong Senador Ninoy Aquino kag sang “Yellow movement” para sa pulitikal nga interes.
Suno kay Bohol, isa lamang ini ka estratehiya sang senador agud mapakita nga makatarungan kag madanihon sa publiko ang iya pagkontra sa administrasyon ni Pangulong Ferdinand Marcos Jr.
Ginpabutyag man sang grupo nga si Ninoy Aquino nagpakig-away batok sa pasismo, korapsyon kag kakulangan sa pagpanabat sang mga lider sa ila mga ginahimo, samtang si Cayetano kag ang pila ka mga senador nga nagasuporta sa iya ginakonektar nila sa kampo sang mga Duterte.
Gindugang pa nga nagpahayag sang suporta si Davao City Mayor Sebastian Duterte kag iban nga kaalyado sini sa ginatinguha ni Cayetano nga mangin Senate President.
