Dismayado ang grupo nga Karapatan sa pagbaton ni President Ferdinand Marcos Jr., sang Doctor of Laws, Honoris Causa sa 58th Commencement Exercises sang Pamantasang Lungsod ng Maynila ukon PLM.
Sa interview sang Bombo Radyo kay Mr. Raoul Manuel, National Council Member sang grupo nga Karapatan, iya ginpahayag nga kun matandaan nga ang amo nga unibersidad may yara sang kasaysayan sang injustice sa idalom sang diktorya ni anay President Ferdinand Marcos Sr.
Suno kay Manuel, madamo pa sang mga isyu nga ginapangatubang ang administrasyon ni Marcos Jr., gani para sa ila, dapat pagatan-awon ang qualifications sang isa ka tawo antes hatagan sang amo nga pagkilala.
Dugang pa sini, posible ini mangin halimbawa sang patronage politics, ukon paghatag sang pabor ukon pagkilala sa mga tawo nga yara sa poder.
Ginpahayag man sini nga para sa ila, dapat ang mga pagahatagan sang honorary doctorate ang may maayo nga ethical kag moral nga rekord, kag may klaro nga kontribusyon sa komunidad.
