Nagpahayag sang kabalaka ang grupo nga Karapatan sa padayon nga pagnubo sang balor sang piso kontra sa dolyar, bangud posible nga dugang nga mabug-atan ang pang-adlaw-adlaw nga pangabuhi sang mga Pilipino, partikular na ang mga mamumugon kag pamilyang may limitado nga kita.
Sa interview sang Bombo Radyo kay Raoul Manuel,National Council member sang Karapatan, iya ginpahayag nga ang paghina sang piso mahimo magresulta sa pagsaka sang presyo sang mga produkto kag serbisyo, bangud nagasalig ang Pilipinas sa imported nga mga produkto kag iban pa nga raw materials.
Suno kay Manuel, ang padayon nga pagsaka sang presyo sang mga balaklon nagahatag sang dugang nga kabudlayan sa mga pamilya nga Pilipino, ilabi na sa mga nagasalig lamang sa ila adlaw-adlaw nga kita.
Ginkwestyon man ni Manuel ang pahayag ni President Ferdinand Marcos Jr. nga indi dapat magpanic ang publiko sa paghina sang piso, bangud suno sa iya, kinahanglan nga kilalahon man ang aktuwal nga epekto sini sa kabuhi sang ordinaryo nga mga Pilipino.
Nagalaum ang grupo nga magapatuman ang gobyerno sang nagakaigo nga mga tikang agud mapunggan ang dugang nga pagsaka sang presyo sang mga balaklon kag maminusan ang epekto sang paghina sang piso sa ekonomiya kag pangabuhi sang mga pumuluyo.
