Ginpanindugan sang Karapatan group nga importante ang papel ni anay Office of the Vice President Special Disbursing Officer Gina Acosta sa pagpamatuod sang ginaalegar iregularidad sa paggamit sang confidential funds ni Vice President Sara Duterte.
Sa interview sang Bombo Radyo kay Raoul Manuel, Karapatan National Council member,iya ginpahayag nga importante ang testimonya ni Acosta bangud isa siya sa direkta nga involved sa proseso sang pag-disburse sang confidential funds sa OVP.
Si Acosta ang una nga hostile witness sang prosekusyon sang Kamara sa impeachment trial ni Vice President Duterte.
Sa iya pag-atubang sa impeachment court sang Agosto 17, ginpahayag ni Acosta nga gin-alegar nagmando si Duterte ang pagpaguwa sang ₱125 milyones nga confidential funds sang Disyembre 2022.
Suno kay Manuel, isa pa sa mabug-at nga pahayag ni Acosta amo ang iya pag-encash sang ₱125 million sa LandBank Shaw Boulevard sang Disyembre 20, 2022 kun sa diin ginsugo siya ni Duterte nga i-turn over ang kwarta kay Col. Raymundo Dante Lachica.
Dugang pa sang grupo nga ang direkta nga ihibalo ni Acosta makabulig sa pag-angot sang mga alegasyon sang mga iregularidad sa aktwal nga proseso sang pagpaguwa kag paggamit sang pondo.
