Nagapanindugan ang grupo nga Karapatan nga political-motivated ang plano nga postponement sang Barangay kag Sangguniang Kabataan Elections (BSKE) 2026.
Sa interview sang Bombo Radyo kay Raoul Manuel, Karapatan National Council Member, iya ginpahayag nga indi ang mga pumuluyo ang makabenepisyo sa pagpostpone sang eleksyon kundi ang mga politiko nga luyag pa magpabilin sa ila mga posisyon.
Suno kay Manuel, kinahanglan nga madayon ang BSKE agud ma-islan na ang mga opisyal nga wala nagatuman sang ila mga katungdanan sang husto kag mapun-an ang mga posisyon nga sa subong nagapabilin nga bakante.
Pahayag pa niya, dapat hatagan prayoridad ang pagpadayon sang eleksyon agud mahatagan sang kahigayunan ang mga botante nga makapili sang mga kandidato nga may kapasidad sa pagserbisyo sa komunidad.
Dugang pa sang natungdan, importante ang BSKE 2026 agud masiguro ang regular nga pagbaylo sang mga lider sa barangay kag Sangguniang Kabataan, kag mapabakod ang partisipasyon sang mga pumuluyo sa pagdumala sang ila komunidad.
