Ginpakamalaut sang grupo sang Karapatan ang pahayag ni Senador-Judge Robin Padilla angut sa isyu sang ginaalegar NPA recruitment kag ang alegasyon sang sala nga paggamit sang confidential funds sang Office of the Vice President kag sang Department of Education.
Sa interview sang Bombo Radyo kay Raoul Manuel, Karapatan National Council member, iya ginpahayag nga daw kaangay nga wala nagapamati sang maayo si Padilla sa mga paghinun-anon sa impeachment trial, gani ginapahayag nga nagapamangkot siya nga malayo sa isyu nga ginahambalan.
Matandaan nga ginsambit ni Padilla ang pila ka mga buluthuan nga ginaalegar nagserbe nga recruitment hub sang New People’s Army ukon NPA kag ginpamangkot ang COA-ICFAO state auditor kun ang katungdanan sang Bise Presidente kag anay Education Secretary ang lakip man sang mga estudyante sa amo nga mga eskwelahan.
Ginpaanggid man ni Padilla ang gina-alegar ₱5.8 billion nga budget sang NPA, base sa impormasyon nga gina-alegar gikan sa National Intelligence Coordinating Agency ukon NICA, sa ₱612.5 million nga confidential funds sang OVP kag DepEd nga gina-akusaran sang piskalya nga misused.
