Pabor ang grupong Karapatan nga magpangayo sang opinyon sa mga amici curiae ang Senate Impeachment Court angut sa kontrobersiya sa voting threshold sa impeachment trial.
Sa interview sang Bombo Radyo kay Raoul Manuel, National Council sang Karapatan, iya ginpahayag nga makabulig ang opinyon sang mga anay Supreme Court justices nga may malawig nga eksperyensya sa mga legal kag constitutional nga isyu.
Suno kay Manuel, importante nga tun-an ang posibilidad sang pagbag-o ukon pag-review sang interpretasyon sang Konstitusyon nahanungod sa voting threshold, ilabi na bangud sa sitwasyon kag numero sang mga senator-judges nga nagapungko sa subong nga impeachment court.
Pahayag pa niya, makahatag sang mas klaro kag legal nga basehan ang pagkuha sang opinyon sang mga eksperto antes magdesisyon ang Senate Impeachment Court sa isyu sang kinahanglanon nga boto para sa conviction.
Dugang pa sang natungdan, dapat mangin transparent kag nakabase sa Konstitusyon ang pagdesisyon sang mga senador agud malikawan ang pagpangduha-duha sa proseso sang impeachment trial.
