Natunga ang reaksyon sang grupo nga Karapatan sa pagdakop kay former House Speaker Martin Romualdez may kaangtanan sa plunder case nga iya ginapangatubang.
Sa interview sang Bombo Radyo Roxas kay Mr. Raoul Manuel,Karapatan National Council Member, iya ginpahayag nga madamo nga mga Pilipino ang nagaselebrar sa pagkadakop kay Romualdez, apang may pila man nga nagakahangawa nga basi “front” ukon ‘for the show’ lang ini.
Suno kay Manuel, seryoso ang kaso nga plunder kag ginapahayag nga non-bailable gani mabudlayan ang akusado nga makalusot sa kaso.
Nahibaluan nga lakip man sa ginpasakaan sang kaso ang pugante nga si former Ako Bicol Partylist Representative Zaldy Co kag duha ka iban pa.
Nagalaum man ang natungdan nga indi lang si Romualdez ang manabat, kundi pati na ang iban nga yara sa likod sang kontrobersiya sa flood control project.
