Pabor ang grupong Kontra Daya sa pagbag-o sang interpretasyon sang ruling may kaangtanan sa voting threshold sa Senate Impeachment Court para sa kaso ni Vice President Sara Duterte.
Sa interview sang Bombo Radyo kay Mr. Danilo Arao, convenor sang Kontra Daya, iya ginpahayag nga isa ka maayo nga tikang ang pag-revisit sang una nga ruling ni Presiding Officer Francis “Chiz” Escudero nga nagtakda sang 16 ka boto bilang duha ka-katlo sang 24 ka miyembro sang Senado.
Suno kay Arao, bangod may mga senator-judges nga indi makatambong sa impeachment proceedings bangod napreso, nagapanago ukon may medical leave, indi dapat kabigon nga absolute ang 16 ka boto bilang kinahanglanon para sa conviction ni Vice President Sara Duterte.
Pahayag pa niya, ang mga senador lamang nga aktuwal nga makatambong kag legal kag factual nga may kapasidad sa pagtambong sa proceedings amo ang dapat kabigon pag-isip sang 2/3 nga voting threshold.
Ini ang kaangot sa bag-o nga ruling sang impeachment court nga nagabase sang threshold sa mga senador nga legal kag factual nga makapartisipar sa tion sang pagboto sa conviction.
