Ginabantayan sang Taumbayan Ayaw sa Magnanakaw at Abusado Network Alliance (TAMA NA) ang pagsumite sang mga dokumento nga ginpa-subpoena sang Senate Impeachment Court sa impeachment trial ni Vice President Sara Duterte.
Sa interview sang Bombo Radyo Roxas kay David Michael San Juan, convenor sang TAMA NA, iya ginpahayag nga isa ka positibo nga tikang ang pagpasa sang pila ka mga bangko kag Bureau of Internal Revenue (BIR) sang mga bank records kag tax records nga ginpa-subpoena sang korte.
Suno kay San Juan, ginahulat man sang ila grupo ang pagsumite sang mga rekord gikan sa Anti-Money Laundering Council (AMLC), nga ila ginakabig nga importante nga kabahin sang mga dokumento nga mahimo magbulig sa pagkumpara sang mga transaction sang bise presidente sa nakadeklara sa Statement of Assets, Liabilities and net worth sa impeachment court .
Pahayag pa niya, nagalaum sila nga masunod ang tanan nga subpoena sang korte kag mangin bug-os ang mga dokumento nga ipresentar agud mapadayon ang impeachment trial sa patas, transparent kag konstitusyonal nga pamaagi.
Matandaan nga ginmandu-an sang Senate Impeachment Court ang nagkalain-lain nga institusyon, lakip ang mga bangko, Bureau of Internal Revenue kag AMLC, nga magsumite sang mga dokumento nga may kaangtanan sa ginapausisa nga mga alegasyon batok kay Vice President Sara Duterte.
