Nagapanawagan ang grupo nga Taumbayan Ayaw sa Magnanakaw at Abusado Network Alliance (TAMA NA) sa gobyerno nga labi pa nga palaparon ang sports development programs para sa mga pamatan-on bilang pamaagi agud mapahilayo sila sa indi nagakaigo nga aktibidad.
Sa interview sang Bombo Radyo kay David San Juan, convenor sang TAMA NA, iya ginpahayag nga importante nga mas madamo ang oportunidad sang mga pamatan-on nga makapakigbahin sa nagkalain-lain nga sports activities agud magamit nila sang maayo ang ila tion kag talento.
Suno kay San Juan, kun may yara sang bastante nga sports programs sa mga komunidad, mahimo nga ma-divert ang atensyon sang mga pamatan-on sa mga aktibidad nga mahimo makatuga sa ila sang problema.
Nagalaum ang grupo nga pagatun-an sang gobyerno ang pagpasangkad sang kasubong nga mga programa kag mahatagan sang dugang nga mga pasilidad, training kag oportunidad ang mga pamatan-on nga luyag magpasakop sa sports.
Dugang pa sang natungdan, magluwas sa pag-improve sang talento kag disiplina, ang mga programa sa pagpauswag sang isports makabulig sa pagporma sang mga pamatan-on nga mangin aktibo nga bahin sang komunidad kag may mas positibo nga direksyon sa kabuhi.
