ROXAS CITY – Nagdangop sa Bombo Radyo ang grupo sang mga graduating students agud ipanawagan sa gobyerno-probinsiyal nga maghatag sang update natuhoy sa estado sa karon sang temporaryo ginpauntat nga scholarship program sang sadto anay administrasyon ni former governor Antonio del Rosario.
Suno sa wala na ginhingadlan nga Business Adminsitration graduating student, tubtob subong nga manugtakop na ang 1st semester sang academic year 2019-2020, wala sa gihapon klaro nga pahayag ang gobyerno-probinsiyal kun padayunon pa sini ukon indi ang nasambit nga scholarship program.
Suno diri nga bangud wala gid sang may ginapadala nga notisya ang gobyerno-probinsiyal sa ila eskwelahan, nabutang sa alang-alang ang ila mga ginikanan bangud wala gid ang mga ini sang kwarta nga inugbayad sa ila tuition fees agud makakuha sang final examination.
Nagpasalig suno sa iya ang Del Rosario administration sang pagtakop sang eleksiyon nga magapadayon ang ila scholarship apang sang nagpungko na ang bag-o nga administrasyon ni Governor Esteban Evan Contreras, nakibot sila tanan sang nakabati nga temporaryo ini nga ginpauntat.
Suno naman sa isa pa ka estudyante, ginpasumiter pa sila sang mga requirements gani naglaom sila nga magapadayon gihapon ang ila scholarship.
Ginpahayag sini nga tani gin-prangka na lamang sila nga wala na sang tupa ang nasambit nga scholarship agud wala na sila naghulat.
Suno diri nga nabutang sila sa alang-alang nga mga graduating students bangud nagasalig lamang ang ila mga ginikanan sa P10, 000 kada semester nga ila nababaton pinaagi sa nasambit nga scholarship program.
