Nagalaum ang grupo sang kabataan nga mapadasig ang proseso sang impeachment trial batok kay Vice President Sara Duterte.
Sa interview sang Bombo Radyo kay Frank Araneta, co-convenor sang Youth Against Kurakot Coalition, iya ginpahayag nga base sa mga articles of impeachment, may bastante nga basehan ang mga reklamo rason nga napasaka ini sa Senado.
Suno kay Araneta, ang mga gin-submit nga articles of impeachment ang dapat hatagan sang seryoso nga pagtamod bangud nakabutang diri ang ginaalegar mga iregularidad ni Vice President Sara Duterte nga kinahanglan ipaidalum sa husto nga proseso.
Pahayag pa niya, importante nga makompleto ang impeachment proceedings agud mapakita ang transparency kag accountability sang mga opisyal sang gobyerno.
Nahibaluan nga sa idalom sang trial, kinahanglan ang 2/3 ukon kabug-usan nga 16 ka boto sa 24 ka senador agud ma-convict ang isa ka impeachable official.
Dugang pa sang natungdan, nga mapatigayon ang trial sa labing madali nga panahon agud mapadasig man ang pag-angkon sang hustisya para sa mga Pilipino.
