Nagapati ang isa ka grupo sang kabataan nga ang tensyon kag mga isyu nga sa Senado ang posible nga nagaserbi bilang “distraction” sa mas importante nga mga isyu, lakip na ang nagahilapit nga impeachment trial batok kay Vice President Sara Duterte.
Sa interview sang Bombo Radyo kay Matthew Silverio, National Secretary General sang Student Council Alliance of the Philippines (SCAP), iya ginpahayag nga ang daku nga kabalak-an ang nagadamo nga kontrobersiya sa sulod sang Senado samtang nagapreparar para sa isa ka sensitibo nga proseso kaangay sang impeachment trial.
Suno kay Silverio, imbes nga matutok ang atensyon sa mga isyu nga dapat ginahandaan kag ginatun-an, nagaluntad pa gid ang mga politikal nga diskusyon kag tensyon sa tunga sang magkalain-lain nga kampo sa Senado.
Pahayag pa niya, posible nga ginalihis lang ang publiko halin sa mas importante nga detalye sang impeachment proceedings tungod sa nagaluntad nga mga isyu.
Dugang pa sang natungdan, dapat likawan ang bisan ano nga tikang ukon pahayag nga mahimo magpalala sang politikal nga tensyon, kag sa baylo pairalon ang transparency kag klaro nga katuyuan sa tanan nga hearing kag imbestigasyon.
