Magapadala sang sulat ang grupo sang mga mamumugon kay President Ferdinand Marcos Jr. may kaangtanan sa indi paglakip sang labor sector sa ginhimo nga Unified Package for Livelihoods, Industry, Food and Transport (UPLIFT) Committee.
Sa interview sang Bombo Radyo kay Wennie Sancho, Secretary General sang General Alliance of Workers Association, iya ginpahayag nga importante para sa ila sektor nga may yara sang representasyon sa kasubong nga komitiba bangud direkta nga apektado ang mga mamumugon sa mga polisa nga ipatuman sini.
Ginpanindugan sang grupo nga dapat pamatian ang tingog sang labor sector agud maamligan ang kaayuhan sang mga empleyado, lakip na ang sweldo, benepisyo kag seguridad sa trabaho.
Sa ila sulat, ginalauman nga magahingyo sila nga usisaon liwat ang komposisyon sang komitiba kag ilakip ang mga tiglawas sang mga mamumugon.
Nagalaum ang grupo nga pamatian sang gobyerno ang ila panawagan kag hatagan sang lugar ang labor sector sa nasambit nga komitiba.
