ROXAS CITY – Nangin madinalag-on ang sinapol nga ginpatigayon sang Capiz Tricycle Operators Drivers and Commuters Alliance (CTODCA) nga ginpasakupan sang grupo sang mga Tricycle/Jeepneys operators/drivers kag Commuters.
Katuyuan sang gintukod nga alyansa nga may sarang dangpan ang grupo angut sa pila ka ginapangatubang nga isyu.
Kalakip sa gintalakay sa sinapol ang sukot sa pletehan, pagtaas sa presyo sang produktong petrolyo kag isyu angut sa 1 passenger policy sa mga tricycle sa diin may mga kabanwahanan na sa karon nga ginapahanugutan ang pagpasakay sa masobra isa ka pasahero.
Hugot man nga ginapamatukan sang grupo ang pagpapasar sa anti terror bill nga kasubong nagalapas sa tawhanon nga kinamatarung.
Sa nasambit nga aktibidad nagpatigayon sang election of officers sa diin nangin dinapit nga bisita ang PISTON Panay President nga si Edgar Salarda kag Bayan Capiz President Darlyn Surriga.
