Ginadayaw ang nangin inisyatibo sang grupo sang mga pamatan-on sa Barangay Dolores, banwa sang Dumalag nga naghimo sang pamaagi agud mabuligan ang mga pamilya nga apektado sang COVID-19 pandemic.
Ginpahayag ni Alexandra Ace Floro Abendan, anay SK chairman sang nasambit nga barangay ginsuguran sang ila grupo nga gintawag AL-Juan ang community pantry sa kagustuhan nga mahatagan sang bulig ang tanan nga nagakinahanglan.
Ang makuha nga bulig sang grupo sa ila gina-solicit, ginabakal sang mga basic needs nga magamit sang mga pumuluyo.
Kapareho na lamang sang mga utanon,prutas, kararuton, canned goods, noodles, kape kag iban pa.
Sa pagsugod kahapon nga adlaw sang AL-Juan community pantry madamo ang nakabenepisyo indi lamang mga residente sang Barangay Dolores, sa banwa sang Dumalag, kundi kalakip ang mga pumuluyo sang iban nga barangay nga nagpila para maka-ambit sag grasya.
Suno kay Abendan nga ginabuhi lamang sang ila grupo ang ispiritu sang bayanihan kag pagbulig sa mga nagakinahanglan.
Nagpasalamat man si Abendan sa Bombo Radyo bangud humalin nga ginpost sa Facebook page sang istasyon ang ila nga nangin hilikuton, nagdamo ang ila mga donors.
Ginklaro man sini nga wala sang political affiliation ang ila nga grupo kag katuyuan lamang sini nga makabulig sa mga apektado sang COVID-19 pandemic.
Ginpasalamatan naman ni Manang Ting Ting, isa sa naka-benepisyo sa community pantry sang AL-Juan nga daku nga bulig sa ila nga mga pumuluyo ang nangin hilikuton sang grupo sa diin naka-ambit sila sang grasya nga gikan sa maluluy-on nga mga pumuluyo pinaagi sa pagpanikasog sang mga pamatan-on.
Suno naman kay Nanay Ester sa nakuha nga utanon nakalibre sila sa pagbakal sang utan kag may sud-an pa sila.
Nahibaluan man gikan kay Abendan nga ang ila nabaton nga isa ka sako nga bugas ang i-repack nila agud madamo ang mahatagan sini.
Samtang sa mga luyag magbulig ukon maghatag sang donasyon mahimo lamang nga ipaagi sa GCash ukon magpakig-angut sa cellphone number 09104538214 ukon magkadto lamang sa ila sa waiting shed sa entrance sang suhot spring.
