Ginpalawig sang Government Service Insurance System (GSIS) ang ila emergency loan program agud malakip ang dugang nga mga lugar sa Luzon.
Ini matapos nga gindeklarar ang state of calamity sa kalabanan nga mga local government areas sa Luzon bangud sang kahalitan sang mga bagyo kag hangin habagat.
Umpisa subong nga Biyernes, Hulyo 25, mahimo na nga mag-apply sang emergency loan ang mga active members kag pensioners nga naga-istar sa apektado nga lugar.
Lakip diri ang Cainta, San Mateo kag Montalban (Rodriguez) sa probinsya sang Rizal, kag ang mga syudad sang Malaban, Marikina, Las Piñas, Navotas, kag Valenzuela sa Metro Manila.
Gin-anunsyo man sang state-run pension fund nga ang mga myembro ukon mga pensioners halin sa Agoncillo sa Batangas, Balagtas sa Bulacan, Malasiqui kag Dagupan City sa Pangasinan, Roxas sa Palawan kag sa bug-os nga probinsya sang Bataan kag Pampanga mahimo mag-apply sang loan tubtob sa Agosto 24.
Nauna na nga ginbuksan ang nasambit nga programa sa 5 ka lugar sa Cavite, Quezon City, Umingan sa Pangasinan, Calumpit sa Bulacan kag Manila City.
