Magapatuman ang Government Service Insurance System (GSIS) sang Balik Ginhawa Program ukon Loan Moratorium Through Refund (LMTR) agud maghatag sang bulig pinansyal sa ila mga miyembro kag pensyonado.
Sa interview sang Bombo Radyo kay John Vianney Ocaña, Branch Manager sang GSIS Roxas City, iya ginpahayag nga sa idalum sang nasambit nga programa, mahimo nga makabaton sang lump sum refund ang mga miyembro ukon pensioner nga makabulig sa krisis nga ginapangatubang sang pungsod.
Suno kay Ocaña, mahimo ga maka-avail ang miyembro kag pensyonado sang nasambit nga programa kun may aktibo nga loan, insakto nga hulog sa gintalana nga petsa, kag wala sang paglapas sa anum ka bulan nga loan wala mabayran.
Pahayag pa niya, bukas sa mga kwalipikado nga mag-apply tubtob Oktubre 31, 2026, samtang mabaton naman ang refund sa sulod sang tatlo ka working days matapos ma-aprubahan ang application apang wala nalakip ang weekends kag holidays.
