ROXAS CITY – Dako nga problema karon para sa mga pumuluyo sang Sitio Tabuc, Barangay Aranguel, President Roxas, Capiz ang guba nga hanging bridge sa amo nga lugar nga ginagamit sang mga pumuluyo sa pagtabok sa suba.
Ini ang ginpahayag ni Punong Barangay Richard Baltar sang mainterview sang Bombo Radyo.
Suno kay Baltar, sadtong nakaligad nga paglaslas pa sang bagyo nga Ursula nagguba ang amo nga tulay kag tubtob sa karon wala pa gid ini makaayo.
Suno sa iya nga naggamit sang lantay nga human sa butong ang mga tawo sa pagtabok sa suba.
Apang tuman ini ka delikado suno kay Baltar ilabi pa sa tion nga nagataas ang lebel sang tubig sa tagsa ka magbubo ang ulan.
Suno diri nga tuman ini ka delikado ilabi na sa mga estudyante nga nagatabok sa suba.
Suno diri nga ila man nga ginapondohan sa barangay ang pag-mentinar sa amo nga tulay apang limitado lamang ang ila pondo para diri kada tuig.
Ginpahayag sini nga iya naman nga napalab-ot sa gobyerno-probinsiyal ang amo nga problema kag ginpainan ini sang kapin P3 milyones agud mapakaayo.
Apang indi pa masuguran ang pagpakaayo sini bangud sang wala pa maaprubahan nga annual budget sang gobyerno-probinsiyal.
Bangud diri, nagapanawagan si Baltar sa provincial board nga aprubahan na ang annual budget sang probinsiya agud masuguran na ang pagkaayo sang amo nga tulay.
Gindugang pa ni Baltar nga may kapin 150 ka mga households sa Sitio Tabuc, sa amo nga barangay kun sa diin kapin 300 ka mga pumuluyo ang naggamit kag nagatabok sa amo nga tulay.
