ROXAS CITY – Premature pa sa karon kun himuon nga mangin state witness si Joel Estorial, ang ginatudlo gunman sa pagluthang-patay sa brodkaster nga si Percival Mabasa ukon mas kilala kay Percy Lapid.
Ini ang ginpahayag ni Atty. Nelson Borja, kilala nga Criminal lawyer nga tumandok sang Capiz, sang mainterview sang Bombo Radyo.
Suno sa abogado, ini bangud wala pa madakpan ang iban pa nga gintudlo ni Estorial nga mga suspek.
Sa tion nga madakpan na ang iban pa nga mga suspek, mahimo nga mag-apply agud mangin state witness si Estorial, ini kun wala sang iban nga testigo ang prosecution ukon kwalipikado ini nga matawag less guilty.
Sa karon, bangud si Estorial man ang gunman, indi mahambal nga less guilty ini, suno pa kay Borja.
Apang, sa tion nga wala na sang iban nga testigo sa kaso, may posibilidad man nga maabsuwelto si Estorial, ini bangud balewalaon sang husgado ang iya ginsumiter nga admission, bangud sa posibilidad nga wala ini gin-agubayan sang iya abugado ukon ginpaako lang sa iya ang krimen.
Nahibaluan nga kinahanglan nga ang isa ka judicial admission ang ginakabug-osan sang independent, competent kag counsel of choice, bangud kun wala ini, balewala ang admission.
