Kumpyansa si Senator Risa Hontiveros nga wala na sang lusot sa layi si Guo Hua Ping ukon si dismissed Bamban, Tarlac Mayor Alice Guo.
Ini ang ginpahayag ni Senador Risa Hontiveros kadungan sa pag-isyu sang warrant of arrest sang Pasig Regional Trial Court ukon RTC sa kaso nga qualified human trafficking batuk sa ginpahalin nga alkalde.
Ginpahanumdum ni Hontiveros nga non-bailable ang human trafficking case rason nga indi na ini makapiyansa kag indi magamit ang iya Philippine Offshore Gaming Operators ukon POGO money agud lusutan ang layi.
Ginkasadya man sang Senadora nga bilang author sang nExpanded Anti-Trafficking in Persons Act napuslan na ini sa karun.
Ginsiling man ni Hontiveros nga umpisa pa lamang ini kag dako na ini nga kadalag-an sa mga nangin biktima sang human-trafficking nga pilit ginapatrabaho kag ginaabuso sa POGO Hub sa Bamban, Tarlac.
Samtang nagpasalamat man ang mamalidha sa Department of Justice (DOJ) sa madasig nga aksyon sa kaso sang peke nga Pilipino subong man sa National Bureau of Investigation (NBI), sa Anti-Money Laundering Council (AMLC), sa Presidential Anti-Organized Crime Commission (PAOCC) kag sa iban pa nga law enforcement agencies nga nagbulig sa Senado sa pagbuyagyag sang kamatuuran.
