Natalana nga pasakaan sang nagakaigo nga panumbungon ang gwardya matapos aksidente nga naglupok ang armas-luthang sini nga ginatinluan samtang naga-duty sa isa ka bangko sa Arnaldo Boulevard, Roxas City.
Suno kay PCMS Ramil Arcangeles, Public Information Officer sang Roxas Component City Police Station, ginahulat nalang sa karon ang desisyon sang mga biktima nga naulamid sa nasambit nga insidente.
Dugang pa sini nga wala pa nakapadulong sa ila talatapan ang mga complainant bangud padayon pa nga ginabulong sa ospital.
Posible suno diri nga Wreckless Imprudence Resulting to Physical Injury ang ipasaka nga panumbungon kag mahulog na sa regular filing ang pagpasaka sang kaso batuk sa suspek.
Matandaan nga nag-angkon sang pilas sa ila mga tiil ang duha ka biktima nga costumer matapos aksidente nga naigo sang naglupok nga armas-luthang sang isa ka guwardya sa banko sa Arnaldo Boulevard.
Samtang, padayon man nga ginabulong sa ospital ang amo nga gwardya matapos naigo man ang iya nawala nga kamot.
