Gin-file ni Rep. Khymer Adan Olaso sang Zamboanga City 1st district sa Kamara ang House Bill 11211 ukon ang Death Penalty for Corruption Act ukon hagna nga papanaugan sang silot nga kamatayon pinaagi sa “firing squad” ang mga opisyal sang gobyerno nga mapamatbatan sang Sandiganbayan sa mga kaso nga graft and corruption; malversation of public funds; kag plunder.
Sa tion nga mangin dalayon ini nga layi, sakop diri ang tanan nga public officials, halin sa Presidente sang pungsod tubtob sa mga opisyal sang mga barangay.
Subong man ang iban pa nga mga yara sa Ehekutibo, Lehislatura kag Hudikatura; constitutional commissions; GOCCs; pati mga miyembro sang Armed Forces of the Philippines ukon AFP kag Philippine National Police ukon PNP.
Gintumod sa hagna ang pila ka safeguards, kun sa diin siguruhon ang “due process” kag proteksyon, kag ang mga pamatbat ang mahimo nga ipasaka sa Korte Suprema agud mapaidalom sa review, kag tugutan ang mga akusado nga gamiton ang anuman nga legal remedies.
Punto sa explanatory note sang House Bill nga nagapabilin ang kurapsyon nga isa sa tuman nga pagpamahog sa social, economic kag political development sang Pilipinas.
Sa pihak sang mga madamo nga layi, nagapadayon ang kalainan, sala nga paggamit sang pondo, kag pagguba sa pagsalig sang publiko.
Kun mapasalayi ang House Bill, mangin mabakod nga mensahe ini sang Kongreso nahanungod sa kun ano ka bilidhon ang accountability, kag ang kurapsyon wala ginakunsinti.
