Nagpasaka sang hagna si Senate President Francis “Chiz” Escudero nga magadumili sa mga himata sang mga opisyales sang gobyerno nga mangin supplier ukon contractor sa mga proyekto sang gobyerno.
Nagasalig si Escudero nga ang Senate Bill No. 783, nga iya gin-file, magapabaskog pa gid sang mga pangamlig sang pungsod batok sa korapsyon.
Ginalakipan sini ang mga transaksyon nga may kaangtanan sa suplay, imprastruktura, joint ventures, kag public-private partnerships, magluwas sa mga kontrata nga ginakabig highly technical, proprietary, o confidential.
Ginpaathag man ni Escudero sa hagna ang sakop sang termino nga “government official,” nga nagalakip sa mga may mga katungdanan sa paghimo sang polisa, administratibo, ukon pagpanguna mapa-career man ukon non-career service —lakip na ang mga yara sa hanay sang militar kag uniporme nga mga tinawo.
Ang hagna nagamando sa Government Procurement Policy Board, Department of the Interior and Local Government (DILG), Public-Private Partnership Center, kag Governance Commission for GOCCs nga maghimo sang mga polisiya kag pagsulundan para sa implementasyon sini sa sulod sang 60 ka adlaw halin sa pag-epektibo sang kasuguan.
Nagalaum ang presidente sang senado nga malakip ang ini nga hagna sa Common Legislative Agenda sang ika-20 nga Kongreso paagi sa Legislative-Executive Development Advisory Council (LEDAC).
