Gin-aprubahan sang Kamara de Representantes sa ila ikatlo kag katapusan nga pagbasa ang hagna nga nagadeklarar sang Nobyembre 30 sang tagsa ka tuig bilang “Jesus Reigns National Day of Worship.”
Sa boto nga 213 pabor, zero batok, kag tatlo ka abstention, ang House Bill (HB) No. 7368 nga ginsulat ni Sarangani Rep. Steven Chiongbian Solon kag Rizal Rep. Emigdio Tanjuatco III.
Suno kay House Majority Leader Ferdinand Alexander “Sandro” Marcos, nga nagpanguna sa pagpasar sang hagna sa plenaryo, ini nga tikang ang pagkilala sa debosyon sang mga Pilipino, sa diin 90 porsyento sang populasyon ang mga Kristiyano kag Katoliko.
Katuyuan sang nasambit nga proposal amo ang pagpain sang pinasahi nga adlaw para sa pagpahayag sang pagtuo kag pagpangamuyo para sa pagbag-o sang pungsod.
Nag-umpisa ang selebrasyon sa Cebu sa idalum sang “Jesus Reigns” movement bilang pamaagi sa pagpabaskog sang moral kag espirituhanon nga pundasyon sang mga Pilipino.
Maga-epekto ang nasambit nga kasuguan 15 ka adlaw matapos ini mabalhag sa Official Gazette ukon sa mga mayor nga pamantalaan.
Nahibaluan nga Nobyembre 30 kadungan man sang pagdumdom sang Bonifacio Day, apang ang bag-o nga proposal ang magaserbe nga isa ka dedikado nga adlaw sang pagsimba sa bug-os nga pungsod.
