Gin-aprubahan na sang Kamara sa ikatlo kag katapusan nga pagbasa ang hagna nga nagapalawig sang termino sang Barangay kag Sangguniang Kabataan Officials sa anum ka tuig gikan sa nakaligad nga tatlo ka tuig.
Sa pagboto, 153 ka mga kongresista ang nag-aprubar sang House Bill 11287.
Apat ka mga kongresista ang nagpamatok kag isa ang nag-abstain.
Nasaad man sa hagna nga ang synchronized Barangay kag SK elections pagahiwaton kada anum ka tuig sa ikaduha nga Lunes sang Mayo umpisa sa tuig 2029.
Wala sang elective barangay officials ang magaserbisyo sang kapin sa duha ka sunod-sunod nga termino sa pareho nga posisyon.
Samtang wala sang opisyal sang Sangguniang Kabataan nga magaserbisyo sang kapin sa isa ka termino.
Ang nasambit nga hagna ang gin-author ni House Speaker Martin Romualdez kag sang pila ka mga lideres sang Kamara.
