Yara na sa Malacañang ang enrolled bill nga nagapaiway sa Barangay kag Sangguniang Kabataan Elections (BSKE) nga natalana sa Nobyembre 2026, samtang ginapadayon gihapon sang Commission on Elections (Comelec) ang preparasyon para sa natalana nga filing sang Certificates of Candidacy (COCs) sa Setyembre 28.
Ginkumpirma ini ni Comelec Chairman George Erwin Garcia sang Martes sa media walkthrough sa Random Manual Audit (RMA) Center sa Davao City.
Suno kay Garcia, napirmahan na ang enrolled bill nanday Senate President Francis Escudero kag House Speaker Faustino “Bojie” Dy III kag napadala na sa Malacañang para sa masunod nga proseso.
Apang kun maglab-ot ang Setyembre 28 kag mag-umpisa na ang filing sang COCs antes mangin epektibo ang bag-o nga layi, ginpahayag ni Garcia nga ipatuman gilayon sang Comelec ang proseso sa tion nga ma-enact ang layi.
Samtang nagahulat sang pinal nga tikang sa enrolled bill, ginapadayon sang Comelec ang preparasyon para sa BSKE, lakip na ang mga election supplies nga gin-procure para sa orihinal nga schedule sang eleksyon.
Suno kay Garcia, indi man mauyang ang mga election supplies apisar pa ipaiway ang eleksyon.
Pinaagi sa isa ka En Banc resolution, mahimo nga i-authorize sang Comelec ang paggamit sang mga ini sa bag-o nga petsa sang eleksyon.
Apang may ginalantaw man nga concern ang komisyon sa mga supplies nga may limitado nga shelf life.
Pahayag niya, nagapakig-angot ang Comelec sa mga suppliers agud mapalawig ang warranties sang pila ka produkto, ilabi na ang indelible ink.
