Ginatarget subong sang Senado ang madasig nga pagpasar sang Senate Bill No. 1625, ukon ang “West Philippines Sea (WPS) Education Act” nga nagatuyo nga mangin kabahin sang Curiculum sa basic kag higher education ang pagtuon nahanungod sa maritime territories sang pungsod.
Nagpanawagan naman si Senate Committee on Foreign Relations Chairman Erwin Tulfo sa iya mga kaupdanan nga Senador nga padasigon ang pagpasar sang hagna.
Suno sa iya, daw kaangay nga madamo sa gihapon sang mga Pinoy ang wala sang bastante nga ihibalo angot sa West Philippine Sea kag iban pa nga teritoryo sang pungsod, gani kinahanglan nga himuon ang tikang agud masiguro nga may husto nga impormasyon ang mga Pilipino sa sitwasyon sang West Philippines Sea.
Sa idalom sang proposal, ang mga syllabi sang basic kag higher education magalakip sang mga learning materials nga nagakabagay sa edad sang mga estudyante sa diin ini nga mga materyales nagalakip sang mga internationally recognized facts, mga desisyon sang Korte Suprema kag mga nagakaigo nga mga kasuguan nahanungod sa WPS.
Pinaagi sa pagbinuligay sang Department of Education (DepEd), Commission on Higher Education (CHED), National Mapping and Resource Information Authority (NAMRIA), National Security Council (NSC), Department of Foreign Affairs (DFA), kag iban pa nga may kaangtanan nga mga ahensya sang gobyerno, ang mga materyales kag paghanas pagahimuon kag kon ini mangin isa ka layi, ini pagamanduan sang nagakaigo nga pagpatigayon sang paghanas sa DepEd para sa mga manunudlo nga gin-appoint sa pagtudlo sang WPS Education.
Samtang, ang hagna naga-engganyo man sa mga State Universities and Colleges (SUCs) nga dugangan ang pagpanalawsaw kag pagtuon sa seguridad kag pagdumala sa kadagatan, mga komunidad sa baybayon kag iban pa nga importante nga ihibalo may kaangtanan sa West Philippines Sea.
