ROXAS CITY, CAPIZ – Positibo ang Alliance of Concerned Teachers (ACT) nga mapasar sa 20th Congress ang ila ginaduso nga ₱50,000 minimum nga sweldo sang mga public teachers sa pungsod.
Sa interview sang Bombo Radyo Roxas kay Max Montero, Chairperson sang Alliance of Concerned Teachers, madugay na nga hinyo sang mga manunudlo ang mag-angkon sang sweldo nga makaigo sa ila mga nagapanguna nga kinahanglanon.
Ginkumpara pa sini ang sitwasyon sang mga manunudlo sa mga pulis kag suldado nga nakabaton sang 50 tubtob 100 porsyento nga umento sadtong nakaligad nga administrasyon.
Samtang ang mga manunudlo, ang nakabaton lamang sang halos lima ka porsyento nga dugang nga swelod nga malayo sa aktwal nga cost of living sa pungsod.
Dugang pa sini, maathag ang tinutuyo sang hagna nga i-correct ang salary distortion nga labi pa nga nagdako matapos madoble ang entry-level salary sang mga uniformed personnel samtang nagapabilin nga manubo ang suweldo sang mga manunudlo halin Teacher I tubtob Teacher III.
Gin-athag ni Montero nga indi sobra ang ila nga ginahinyo kundi isa ka disente nga sweldo nga makaigo kag bastante sa mataas nga presyo sang mga balaklon kag iban pa nga nagapanguna nga galastuson sang isa ka pamilya nga Pilipino.
Nagalaom ang Alliance of Concerned Teachers nga makakuha sang bastante nga suporta ang House Bill 203 nga gin-file nanday ACT Teachers Party-list Representative Antonio Tinio kag Kabataan Party-list Representative Renee Co agud gilayon ini nga mapsalayi.
– Interviewed by: Bombo Lynd-C Bade
