Haligi sang puluy-an ukon pagiging isa ka amay sa isa ka pamilya, mga tinaga nga bisan sin-o indi matupungan ang mga sakripisyo, pag-antos kag kabudlay nga ila nga ginapangatubang.
Ini ang paglaragway ni Mr. Eduardo Apa-ap, anay pinuno sang Provincial General Services Office (PGSO) kag amay sang tatlo ka mga kabataan.
Sa interview sang Bombo Radyo kay Mr. Apa-ap, ginpakigbahin sini nga daw palarehas lamang ang na-eksperyensyahan sang tagsa ka mga amay apang kinalain lang kung paano ini magtindog bilang isa ka haligi sa pamilya.
Suno diri, bilang amay ginauna sini ang kaluwasan, kinahanglanon sang iya mga kabataan ilabi na sang iya asawa.
Mahibaluan nga tuig 1977 nagsugod ini nga mag-obra sa kapitolyo bilang isa ka casual nga janitor kag nangin regular Agusto 15 sa amu man nga tuig.
Sa kagustuhan nga makatapos sa iya pag-eskwela samtang nagatrabaho naga-eskwela ini sang night shift kag nagkuha sang kurso nga enhenyero sa Collegio dela Purisima Conception.
Mayo 11, 1985, sang ginkasal si Apa-ap sa asawa sini nga si Nancy Almasol Apa-ap kag nagbun-ag sang ila subang nga babaye Pebrero 25, 1986 nga sa karun isa na ka nurse kag nagatrabaho sa Houston Texas, United States.
Sa nasambit nga tion, diri na suno diri nagsugod nga magbag-o ang iya kabuhi bangud madamo sang mga butang nga nagasulod sa iya pinsar kag nanari-sari nga emosyon ang iya nabatyag.
Bangud sa iya nga pagtimakas napatapos sini ang iya ika-duha nga bata nga lalaki sa kurso nga doctor kag natigayon man nga makapasar sa board examination.
1992 sang ginbun-ag sang iya asawa ang ila hinipo nga bata nga lalaki kag nagtapos sa kurso nga B.A Political Science kadungan man sang iya nga pagkapasar sa professional level.
Matapos mangin madinalag-on sa iya karera, nagsunod-sunod na suno diri ang mga bugal nga nag-abot sa ila pamilya butang nga iya ginpasalamat sa mahal nga maka-ako.
Sa pihak sang iya masako nga oras, wala sini niya suno diri napabay-an ang iya pamilya sa bulig man sang iya asawa nga yara sa tanan nga oras agud magtimbang sa iya sa paggiya sa ila mga kabataan para sa ila bwas damlag.
