Naghabok na sa P121.88 million ang balor sang halit nga naagom sang sektor sang agrikultura bangud sa gintingob nga epekto sang bagyo Crising kag hangin habagat.
Sa report nga ginpaguha sang Department of Agriculture – Disaster Risk Reduction and Management Operations Center, naghabok pa sa 7,911 ka ektarya sang mga ulumhan ang apektado kun sa diin masobra 1,300 ka ektarya ang totally damaged.
Ini ang nagresulta sang pagkaguba sang tubtob 3,075 metriko tonelada sang nagkalain-lain nga agri products kag naka-apekto sa kabug-usan 6,377 nga mga mangunguma kag manugpangisda.
Dako nga porsyento sini ang nagikan sa rice industry nga naglab-ot sa 90.51% samtang ang mga nabilin ang ginakalakipan na sang mais, high value crops, poultry, fisheries, kag iban pa.
Nagapanguna nga naapektuhan ang mga ulumhan sa probinsya sang Cagayan, Tarlac, Bataan, kag Negros Occidental.
Nagapabilin naman nga available ang kabilugan nga P495 million nga balor sang agri inputs sa mga regional office sang Department of Agriculture nga mahimo ipanagtag sa mga mangunguma nga apektado sa kalamidad.
Suno sa Department of Agriculture, nagapatigayon naman sang assessment ang mga field office sang Philippine Crop Insurance Corporation (PCIC) para sa mga mangunguma nga nauna na nga nakapasiguro sa ila nga mga ulumhan. Pagsiguro sang ahensiya, nakapreparar ang bastante nga balor para sa insurance claims sang mga mangunguma.
