Naglab-ot na sa P4.19 bilyon ang kabilugan nga halit sa agrikultura nga tuga sang Super Typhoon Uwan, sandig sa pinaka-ulihi nga datos sang Department of Agriculture (DA).
Apektado ang 85,689 ka mga mangunguma kag manug-pangisda sa nagakalain-lain nga sektor kalakip ang palay, mais, high-value crops, livestock, poultry, kag fisheries.
Suno sa Department of Agriculture-Disaster Risk Reduction and Management Operations Center, nagapadayon ang koordinasyon sa mga lokal nga gobyerno agud mapadasig ang recovery efforts.
Nagapabilin man ang price freeze sa mga lugar nga yara sa idalom sang state of calamity, samtang nagapadayon ang hugot nga price kag market monitoring.
Nag-umpisa naman nga nagpanagtag sang agricultural inputs kasubong sang hybrid rice seeds, white corn seeds, kag fingerlings ang mga regional field offices sa Cagayan Valley kag Mimaropa.
Kalakip sa mga available nga interbensyon ang P414.51M nga balor sang inputs para sa palay, mais, kag high-value crops; P1.24M para sa animal feeds; P771,620 nga balor sang bangrus, tilapia, kag carp fingerlings; kag zero-interest loans nga tubtob sa P25,000 sa idalom sang SURE program.
Sa datos sang Department of Agriculture, high-value crops ang pinaka-lugi nga may P2.66B nga halit, kasunod ang palay nga may P732.48M, kag fiber crops nga may P428.37M. Naglab-ot naman sa 164,274 metric tons ang nadula nga produksyon halin sa 99,572 ektarya sang ulumhan.
Padayon nga gina-monitor sang DA ang presyo sang agricultural commodities kag kondisyon sang road networks agud masigurado ang madasig nga transportasyon sang mga produkto kag bulig para sa mga apektado nga lugar.
