ROXAS CITY – Nagalab-ot sa kabug-usan nga 93, 243 ka mga benepisyaryo nga mga kubos gikan sa magkatuhay nga mga lugar sa pungsod ang nabuligan naman kasunod sang tuigan nga Bombo Medico sang Bombo Radyo Philippines.
Ang nasambit nga numero ang nalapawan pa ang mga nabuligan sa ginpatigayon man nga Bombo Medico sang nakaligad nga tuig 2018.
Una diri, dululungan nga ginpatigayon ang Bombo Medico 2019 sa 24 ka mga lugar sa pungsod nga may yara sang Bombo Radyo kag Star FM stations kun sa diin ang Bombo Medico ang nagpanghatag sang libre nga bulong para sa may mga ginabatyag, libre nga paggabot sang ngipon kag madamo pa nga mga serbisyo para sa mga tawo nga nagakinahanglan.
Ang ginpatigayon nga Bombo Medico 2019 ang kasunod sang ika-53 ka tuig nga anibersaryo sang Bombo Radyo Philippines humalin sang ini ang natukod sadtong tuig 1966.
Magluwas sa kabug-usan nga 33, 967 nga nahatagan sang serbisyo-medikal, kapin sa 9, 926 naman ang naka-avail sang dental services, 14, 500 ka mga benepisyaryo para naman sa optikal, samtang kapin sa 34, 850 man ang nakabaton sang iban pa nga libre nga serbisyo kapareho sang pagpanghatag sang dentures, hearing aids, arm prosthetics, wheelchairs, crutches, reading glasses, kalakip man ang libre nga circumcision ukon tuli, x-ray, ECG, massage, haircut, HIV testing, cataract screening, blood sugar testing, prostate screening kag kalakip man ang minor surgery sa mga bukol, harelip kag cleft palate kag hernia.
May yara man sang legal services, feeding program, nagkalain-lain nga lectures sa ikaayong-lawas kag may nagpanghatag man sang dental kits, libro kag tsinelas kag madamo nga iban pa.
Sa bag-o lamang nagtakop nga Bombo Medico 2019, naglab-ot sa record-breaking nga 22 ka milyon ka pesos nga balor sang mga medisina kag iban pa nga health products ang ginpanghatag sa mga nagakinahanglan sang bulig sa bulong kalakip na diri ang mga dental patients.
Mas o menus 47 ka milyon ka pesos naman nga balor sang libre nga konsulta, paggabot sang ngipon kag iban pa nga serbisyo ukon cost of services ang ginpanghatag sang libre pinaagi sang mga espesyelista nga doktor, dentista, kag iban pa nga allied health professionals nga himpit kag boluntaryo gid nga naghatag sang ila oras para lamang makabulig sa aton mga kasimanwa nga mga pigado.
Ginapahayag nga ang nahimo sang Bombo Radyo Philippines para sa Bombo Medico 2019 ang pinakadako nga nahimo nga Medical, Dental and Optical missions sang isa ka media entity sa Pilipinas sa isa gid lamang ka adlaw sa kadamuon sang nabuligan, kadakuon sang balor sang bulong kag sang total amount sa serbisyo kag supplies nga ginpanghatag sa mga nagakinahanglan.
Ang simultaneous nationwide medical, optical kag dental mission ang isa sa dako nga programa nga gintukod sa idalom sang pagpamuno sang chairman sang Bombo Radyo Philippines nga si Dr. Rogelio M. Florete, agud mabuligan ang aton pigado nga mga kasimanwa kag bilang kabahin man sang corporate social responsibility.
Kada tuig man, kaupod ang President kag CEO sang Bombo Radyo Philippines nga si Margaret Ruth C. Florete, nagalevel-up ang mga proyekto nga gintukod ni Dr. Florete agud makabulig sa poorest of the poor sa Philippine society.
Matandaan nga ang iban pa nga mga proyekto sang network nga ginapatigayon amo ang Dugong Bombo tagsa ka bulan sang Nobyembre.
Ang bloodletting activity nga ginapatigayon man sang dululungan sa mga Bombo Radyo kag Star FM stations nationwide kag para naman sa kultura amo ang Bombo Music Festival tagsa ka bulan sang Enero para sa mga composers, lyricists, kag singers sang OPM music.
Ang madinalag-on naman nga Bombo Medico ang bangud sa kooperasyon kag bulig sanhg aton mga sponsors kapareho sang Morifer, Filipino Indian Chamber of Commernce Incorporated kag sang Department of Health.
Ang 24 ka mga lugar kun sa diin dululungan nga ginpatigayon ang Bombo Medico 2019 ang ginalakipan sang siyudad sang Tuguegarao, Cauayan, Laoag, Vigan, La Union, Dagupan, Baguio, Naga, Legazpi, Bacolod, Iloilo, Roxas, Kalibo, Cebu, Tacloban, Davao, General Santos, Butuan, Koronadal, Cotabato, Dipolog, Cagayan de Oro kag Zamboanga City.
Sa ngalan sang management and staff sang Bombo Radyo Philippines, ang hugot namon nga pagpasalamat sa aton nga mga sponsors, doctors, dentists, pharmacists, nurses kag medical staff kag iban pa nga mga volunteers nga nangin kabahin sang Bombo Medico 2019.
