HONGKONG – Halos 100 ka mga tawo na ang temporaryo nga naka-evacuate sa mga temporary shelters sa Hongkong bangud sa pagpanalasa sang typhoon Higos.
Mahibaluan nga 25 ka mga temporary shelters sa magkatuhay nga distrito sa pungsod ang ginbuksan sang Home Affairs Department para sa mga tawo nga apektado sang Storm Signal No. 9 tuga sang nasambit nga bagyo.
Sa interview sang Bombo Radyo kay International Correspondent Merlie Buño Protacio, tumandok sang Barangay Milibili, Roxas City, nga naba-se karon sa Siu Sai Wan sa nasambit nga pungsod, ginpahayag sini nga halos wala na sang nagaguwa sa ila kabalayan bangud sa kabaskugon sang hangin kag pag-ulan nga dala sang bagyo.
Nagaguwa lamang sila agud magbakal sang ila kinahanglanon partikular na ang pagkaon.
Gindugang pa sini nga wala pa sang na-report nga mga Pinoy nga napatay ukon napilasan bangud sa pagpanalasa sang nasambit nga bagyo.
