Nagdangat na sa 57,316 ka mga pamilya ang kumpirmado nga apektado sang halit sang bagyo Inday nga nagapalala sang nagaluntad nga hangin habagat.
Katumbas ini sang masobra 248,000 ka mga indibidwal gikan sa 161 ka mga barangay sa bug-os nga pungsod.
Sa subong, masobra 6,400 ka tawo ukon katumbas sang 1,900 ka pamilya ang nagatiner sa sulod sang evacuation center.
Nagbukas man ang gobyerno sang masobra 40 ka mga evacuation centers para sa mga biktima sang pagbaha kag mabaskog nga ulan agud makapasilong.
Ginalauman nga magadamo pa ang nasambit nga data samtang nagapadayon ang assessment kag validation sang Department of Social Welfare and Development (DSWD) kag National Disaster Risk Reduction and Management Council (NDRRMC) sa mga apektado nga lugar kag mga pumuluyo.
Lakip sa mga apektado nga rehiyon amo ang Cagayan Valley, Cordillera, Ilocos Region, Central Luzon, Western Visayas, Negros Island, Zamboanga Peninsula, Northern Mindanao, Davao, SOCCSKSARGEN, kag BARMM.
