Nagapadayon ang pagpatay sang mga otoridad sa wildfire nga nagluntad sa France malapit sa border sang Spain, nga nagresulta sang malapad nga kahalitan kag pag-evacuate sang linibo ka residente.
Suno kay Bombo Leo Brisenio, international correspondent sa Paris, France, iya ginpahayag nga naglab-ot na sa 4,936 ka ektarya ang kalaparon sang lugar nga nasunog bangud sang wildfire.
Pahayag pa ni Brisenio, gin-evacuate man ang indi magnubo sa 12,000 ka residente halin sa 27 ka mga munisipalidad sa rehiyon agud maproteheran samtang nagapadayon ang pagresponde sang mga bumbero.
Apang, gintugutan na ang pila ka mga residente nga mahimo na nga makabalik sa ila puluy-an bangud naghupa na ang kalayo sa pila ka bahin sang apektado nga lugar.
Samtang, padayon naman ang operasyon sang mga emergency responders sa pagbantay sang epekto sang mainit nga panahon, mabaskog nga hangin kag mamala humidity nga ginakabig isa sa mga nagapabudlay sa pagpugong sang wildfire sa nasambit nga rehiyon.
