Nakabalik na sa tagsa nila ka puluy-an ang halos tunga sa milyon ka tawo sa hilaga nga parte sang Gaza Strip nga nangin sentro sang bakbakan sa tunga sang Israel kag Hamas base sa report nagikan sa United Nations.
Apang sa isa ka news conference, ginpahayag ni Office for the Coordination of Humanitarian Affairs (OCHA), spokesman Stephane Dujarric nga nagahulag ang na-displace nga mga Palestino nagikan sa norte padulong sa timog nga porsyon sang Gaza.
Base sa datus, yara sa 8,500 ka tawo ang nagtabok nagikan sa northern areas sang Gaza padulong sa timog. Ginpabaskog naman sang UN kag humanitarian partners ang ila pagsabat sa monitoring points kalakip ang first aid kag psychological support para sa most vulnerable kasubong sang mga bata, kababainhan kag mga tigulang.
Maluwas diri, ginpalawig man sang UN ang aid operations sini sa northern Gaza.
Sa pagbisita naman sang humanitarian team sa 2 lugar sa South Remal kag Tel el Hawa nga kaiping nga lugar sa Gaza city, ginpabatyag sang mga tawo sa lugar ang ila mga kinahanglanon kasubong sang tubig, mga kitchen supply, kumot kag mga kagamitan nga pangtinlo.
Matandaan nga nangin epektibo ang ceasefire sa tunga sang Israel kag Hamas sang Enero 19 nga nangin pagpanumbalik sang mga na-displace nga Palestino sa northern Gaza.
Napauntat man sang ceasefire deal ang masobra isa ka tuig nga giyera nga nagpatay kag nagpa-displace sa linibo ka mga indibidwal.
