ROXAS CITY – Wala na halos nagaguwa ang mga residente sa United Arab Emirates kasunod sang ginapatuman nga lockdown sa pungsod bangud sang coronavirus disease (COVID-19) pandemic.
Ini ang base sa report sa Bombo Radyo ni Bombo International Correspondent Jonalyn Regala.
Suno diri nga indi magnubo sa 2, 000 dirhams ukon masobra sa P25, 000 ang multa sa sinuman nga magalapas sa quarantine protocols sang pungsod nga mas dako pa suno diri sa iya bulanan nga sweldo.
Mahibaluan nga kalakip sa ginapapanaugan sang nasambit nga penalty amo ang mga nagalapas sa home quarantine instructions, mandatory hospitalization, mga nagapadulong sa closed public spaces kag mga unnecessary travel.
Talalupangdon naman ang buhi nga ‘Bayanihan spirit’ sang Filipino community sa pungsod bangud sa ginapalab-ot nga bulig sa mga apektado nga mga Pinoy workers pinaagi sang kwarta kag mga pagkaon.
