Ginkumpirmar sang Department of Health (DOH) nga triple ang gintaas sang mga kaso sang Hand, Foot, and Mouth Disease (HFMD) sa pungsod.
Sa datos sang DOH, naglab-ot na sa 7,598 ka kaso sang HFMD ang nabalhag halin Enero 1 tubtob Pebrero 22, 2025.
Ini ang halos tatlo ka beses nga mas mataas kun ikumparar sa 2,665 kaso sadtong 2024.
Sa pihak sini, ginpahayag sang DOH nga ang nasambit nga mga kaso ang mas manubo pa sa gihapon kun ikumparar sadtong 2023 kun sa diin nakabalhag sila sang lapaw sa 2,500 sa isa lamang ka semana sumugod Pebrero.
Suno sa DOH, masobra sa tunga ukon 52% sang mga kaso sang HFMD ang gikan sa Central Luzon, MIMAROPA, Metro Manila, kag Cordillera Autonomous Region (CAR).
Yara sa 56% ukon 4,225 sang kabug-usan nga kaso ang pareho nga mga kabataan nga nagapang-edaron sang apat ka tuig panubo ang edad samtang 2,069 ang yara sa edad nga lima tubtob 9 ka tuig.
Pahayag sang DOH, ang HFMD ang isa ka makalalaton nga sakit nga nagalapta pinaagi sa pag-asik sang laway nga may virus. Mahimo man nga makuha ang virus kun ang isa ka tawo ang nag-uyat sa iya nga mata, ilong, ukon bibig gamit ang kamot nga nahawiran ang butang nga kontaminado sang virus.
Kalakip sa mga sintomas sini amu ang lagnat, ubo, singaw sa bibig, kag mga paltos sa kamot, tiil, kag alatrasan.
Nagpaandam man ang DOH nga mahimo nga magtuga ang sakit sang mas malala nga komplikasyon kasubong sang meningitis kag encephalitis ukon pagpamaga sang utak.
Panugyan pa sang DOH, ang mga tawo nga may sakit ilabi na kun ginadudahan ukon kumpirmado nga kaso sang HFMD ang dapat magpabilin sa balay kag likawan anay nga magsulod sa klase ukon trabaho sa sulod sang pito tubtob pulo ka adlaw ukon kutob sa tion nga madula na ang lagnat kag magmala na ang mga pilas.
