ROXAS CITY – Gindugukan sang ginatos nga mga Capizeño ang ginpatigayon nga Handog ng Bombo Radyo at Star FM sa Sinadya 2019 Dance Showdown Competition sa Dinggoy Roxas Civic Center.
Pito ka mga dance groups ang naghataw kag nagpakita sang ila nga pagkamasampaton sa pagsaot sa dance floor nga ginalakipan sang Street Impact, Fortiz Aliumz, Cedentary Crew, One Crew, King of Motion, Vtrex, kag TNG Family.
Ginpasidunggan nga kampeon ang One Crew nga nga nakabaton sang P10, 000 nga cash prize, 1st runner up ang TNG Family nga nakabaton sang P7, 000 kag P5, 000 naman ang nabaton sang Fortiz Aliumz nga nangin 2nd runner up.
Wala naman nagpauli nga masubo ang iban nga mga participating groups bangud nakabaton man sila sang consolation prizes.
Mahibaluan nga magluwas sa pito ka mga dance groups, ginkalipay man sang mga tumalan-aw ang live performance sang Cytoplasm Band, ang ginkilala nga kampeon sa Handog ng Bombo Radyo at Star FM sa mga Capizeño Battle of the Bands Competition sadtong Abril kadungan sang Capiztahan 2019.
Magluwas diri, nagpakita man sang talent ang mga haranista sang Harana Live sa Bombo kag pila ka mga personnel sang Bombo Radyo Roxas.
Ang nasambit nga kompetisyon ang ginpatigayon sang Bombo Radyo kag Star FM kadungan sang selebrasyon sang kapistahan ni Immaculada Concepcion ukon ang ginbansagan nga Sinadya Festival.
