Handum para sa iya pamilya ang nangin inspirasyon ni Hanz Juneric Amores sa pagpadayon sa pagkanta, bisan pa sa mga pagsulay kag paghukom nga iya naagyan.
Sa interview sang Bombo Radyo kay Amores, iya ginpahayag nga bata pa lamang siya sang nagsugod na ini sa pag-intra sa mga singing contest.
Suno sa iya, masami man siya nga napirde sa mga contest, apang wala ini nadulaan sang paglaum bangud nagapati siya nga magaabot ang tion nga makadaog man ini.
Pahayag pa niya, madamu sang mga paghangkat ang iya naagyan sa iya pagtinguha sa pagkanta, ilabi na ang mga paghusgar sang mga tawo sa iya palibot.
Dugang pa sang natungdan, isa sa pinakamabug-at nga challenge nga iya naagyan amo ang tion nga nagmasakit ang iya amay, nga nangin rason para mas magpaninguha pa siya agud masuportahan ang ila pamilya.
Apisar nagtaliwan na ang iya amay, padayon gihapon niya nga ginadala ang mga tudlo kag leksyon nga iya natun-an halin sa iya.
Dugang pa sang natungdan, sa mga kabataan man kaangay niya kinahanglan nga magpati sa kaugalingon kag padayon nga magpaninguha agud maabot ang mga handum sa kabuhi.
