Tuman ang kalipay kag kaangay indi pa sa gihapon kapati ang ginkoronahan sang Hangaway sang Capiz 2026 sang kakatakop lang nga Hangaway kag Lin-Ay sang Capiz 2026 nga ginhiwat sang Abril 16, 2026 sa Villareal Stadium, Roxas City kadungan sang Capiztahan 2026.
Sa interview sang Bombo Radyo kay Clydd Jenner Generoso, Hangaway sang Capiz 2026 nagikan sa banwa sang Dumarao, iya ginpahayag nga indi nangin mahapos kag madasig ang preperasyon para sa amo nga pageant competition.
Suno kay Generoso, ang pagpati sang kaugalingon nga ikasarang kag paghatag sang all-out performance ang nangin yabe agud makuha ang kadalag-an.
Sa sulod sang iya nga termino, pagatutukan sini ang adbokasiya nga nakasentro sa bolunterismo sang mga kabataan sa probinsya. Ang amo nga adbokasiya nagatuyo nga mahatagan sang ihibalo ang mga pamatan-on nga pamaagi sa bolunterismo, makabulig sang dako sa isig ka-tawo.
Pahayag niya, para sa mga kabataan nga nagahandom nga mangin representative sang tagsa nila ka mga banwa sa nagkalain-lain nga plata-porma, padayon lang nga saligan ang kaugalingon bangud nga dira naga-umpisa ang tanan para sa paglab-ot sang kadalag-an.
Nagapasalamat naman ang natungdan sa Local Government Unit sang Dumarao kag sa tanan nga mga tawo nga nagsuporta sa iya nga journey sa amo nga kompetisyon.
